فتكات
موضوع بعنوان :علاج الشعر الهايش بطريقة طبيعية 100% ومجربه
الكاتب :fatakat

---

علاج الشعر الهايش فتكات وبانفراد وحصريا وطبيعية 100% ومجربه وهتعجبك جدا
تعددت الاسباب والشعر واحد

(تساقط -تقصف -قصير -بهتان -مجعد-...........)

طيب نعمله ايه نسيبه كده لأ طبعا لازم نهتم بيه وياريت لو انتى بنت لسه مش اتجوزتى اهتمى بيه متستنيش لما تتخطبى ساعتها مش هتلحقى ايونز صدقينى واللى عندها بنت صغيرة بلاش تظلميها لازم تهتمى بشعرها بدل ما تندم طول عمرها على معاملتك السيئه لشعرها

معلش يا جماعه انا دخلت سخنه بس اصل بلاقى امهات بتعمل حاجات فى شعور بناتهم واولهم امى الحبيبه ربنا يحفظها يارب ويشفيها (شايفاكى يا اللى مقلتيش امين)

كنت بسرح لاختى (ربنا يشفيها برده )ما شاء الله شعرها طويل وتقيل بس بدأ فترة من ادويه وكده بيقع بيتساقط يعنى فبقول لماما شوفى حل نلحق شعر البنت قبل ما تبقى قرعه زى اختها الكبيرة (انا يعنى )قالتلى احسن مش كفايه طويل كمان يبقى تقيل ده بيغلبنى فى تسريحه ما علينا


المهم انا (واعوذ بالله من كلمه انا)بهرى شعرى خلطات بقالى 7 سنين تقريبا لانه اتدهور بسبب انى دعيت عليه لانى كان مغلبنى فى تسريحه (هبل ما انا كنت طفله ) كان شعرى تقيل جدا وطويل لحد اخر ظهرى وناعم الى حد ما مش سايح بس لما بعمله كحكه كانه مكوى

قصيته من اوانا فى 1 اعداى كاريه ومن ساعتها حلف ما يطول تانى ابدا الكوافيرة قالتلى الشعر بيحزن لما بتجزيه كله مرة واحده
شعرى بقى قصير خف للربع او اقل وبقى هايش ومتقصف وفيه العبر يعنى

بس المشكله انى مش بستمر على حاجه فمش بلاقى نتيجه خالص وبعدين جت الطامه الكبرى وفردته

شعرى اتزعر(قصر يعنى) وبقى بيتساقط والى جانب هذا وانا بسرحه بيتقطع حتت صغيرى اقسم بالله كنت لابسه تيشرت ابيض وبسرح صعقت لما شفت منظر التيشرت كله قطع شعر صغير قمت قعدت على النت وافحص وامحص لحد ما جربت خلطه هى كانت على فتكات ربنا يجازيها خير اللى كانت كتباها (بس انا طبعا لازم احط التاتش بتاعى (قررت ان شاء الله ان ربنا احيانى استمر عليها لان نتيجتها مبهرة ومن اول مرة

انا هاقول المكونات وفائده كل مكون للشعر وبعدين النتيجه على شعرى اوكيش

بس قبل اى حاجه نستحضر النيه ان احنا بتجمل لازواجنا او لو مش متزوجه تطبيقا للحديث:

عَنْ أَبِي هُرَيْرَةَ رَضِيَ اللَّهُ عَنْهُ ، عَنِ النَّبِيِّ صَلَّى اللَّهُ عَلَيْهِ وَسَلَّمَ ، قَالَ : " مَنْ كَانَ لَهُ شَعْرٌ فَلْيُكْرِمْهُ " .

المكونات :

1- عدد ثمرة موزة بدون قشر مستويه جداااااا:

فوائد الموز للشعر هى فهو غني بالبوتاسيوم والزيوت الطبيعية والكربوهيدرات والفيتامينات التي تساعد في تليين الشعر ويحمي مرونة الشعر الطبيعي ويمنع التقصف والتكسر. ويزيد مت تألق الشعر، والسيطرة على نمو قشرة الرأس.

الموز يزيد من قوة وقدرة الشعر على التحمل و معظم منتجات الشعر التي تحتوي على الموز لا تتوفر إلا في الصالونات المكلفة. ومع ذلك، يمكنك صنع قناع الشعر الخاص بك فالموز مليئ بالفيتامينات وعدد من العناصر لتعزيز و تكثيف الشعر. أنه يساعد في إصلاح الشعر الجاف والشعر المتلف من الشمس.الأضرار التي أصابت الشعر عن طريق التعرض للأوساخ والتلوث والسموم البيئية الأخرى يمكن علاجها مع قناع الموز الذى يساعد في الوقاية من التقصف.

2- 2 ملعقه طعام عسل نحل ابيض:

يحتوى العسل على الكثير من الأحماض الأمينية المرممة ، ما يجعله حليفاً ممتازاً للشعر الجاف والحساس ، وتعمل السكريات فيه على تغليف قشور الشعر فيما تعزز أصباغه اللون الطبيعى للشعر وتضفى عليه انعكاسات جميلة ، كما يمتاز العسل بمفعول مضاد للجراثيم ، مما يجعله مثالياً لفروة الرأس المتهيجة أو العرضة للقشرة.

3- 2 او 3 ملعقه بن ساده :

القهوة مفيدة جدا فى تساقط الشعر وتقصف الشعر وتزيد من لمعانه وقوته ولكى تستفيدى من القهوة يجب ان تشربى من 60 الى 80 كوب فى اليوم الواحد فوجد الاطباء والعلماء ان افضل طريقة لتحصيل فوائد القهوة للشعر هو بوضعها على الشعر مباشرة كماسك للشعر

4-كيس خميرة فوريه :

الخميرة من اغني المواد الطبيعه بالبروتينات والمعادن والفيتامينات خصوصا عائله فيتامين ب ودي بتحافظ على رطوبه الشعر وفيه ب5 الذي يقوي الشعر ويمنع تساقطه وب9 المسئول عن تاخر الشيب ايضا البروتينات فى الخميرة تساعد على تقويه الشعر لانه مكون اساسا من البروتين ونقصه يودي الي ضعف الشعر وخفته والخميرة تحافظ على فروة راس صحيه ومتغذيه والنتيجه نمو شعر صحي وجميل

5-كوب زبادى :

غني بالبروتين والمغذيات ويرطب الشعر بشكل واضح ويساعد على نظافه فروة الراس

6-ربع كوب لبن:

يعمل على تنعيم الشعر واستقامته (كفايه ان كليوبترا كا بتستحمى باللبن كل يوم:

7- ملعقه زيت جوجوبا (او اى زيت مفيد للشعر عندك بس ما يكون زيت حار لوحده ):

يمكن استخدام زيت الجوجوبا بشكل كامل كمنتج مثالي للعناية بالشعر و ذلك لرعاية و علاج الشعر الجاف و الخشن و هو وسيلة ممتازة أيضا للوقاية من و علاج مشكلة الشعر المتقصف الأطراف ويؤدي إلى إصلاح و مكافحة الشعر المتجعد و ذو المظهر الممل بنجاح، مما سيجعل شعرك في النهاية نعاما و لينا و براقا.

ممكن للريحه اضافه معلقه اى زيت عطرى عندك(ورد -خزامى -صندل )

نيجى للطريقة فى ناس قالت ان الموز غسيله صعب مين اللى قال كده تعالى كده وانا اقولك

1- بضرب الموز مع اللبن فى الخلاط ولو احتاج زوديله سنه بسيطه خالص بيبقى شكله كدا

2- تضيفى الخميرة وتضربى بالخلاط تانى

3-ضيفى علبه الزبادى والعسل والبن واضربى لحد ما يتجانس خالص فى الخلاط وبيبقى كده بعد ما حطيت عليه الزيت

4-ونقلب كويس وبعدين نعملها حمام مايه سخنه جدااا زى كده

واهى قدامكوا لا فيها كلاكيع ولا اى حاجه قوامها عامل زى قوام الزبادو

وعقبال ما تسخن مش هنقعد حطين ايدنا على خدنا ابسلولتى

نغسل الشعر كويس بالشامبو المناسب انا بستخدم شامبو ايفرى ستراند بالكرياتين بس بخففه بالمايه عشان الشامبو على الشعر مباشرة غلط جدا وعلى فكرة بيرغى كويس متخافيش وحاولى تستخدمى اقل كميه شامبو ممكنه لو احتجتى تانى استخدمى حبه كمان بلاش نص ازاة الشامبو على شعرك مرة واحده

ده الشامبو

وده بعد ما خففته

وتنشفى شعرك تحت الفوطة لحد ما الخلطه تجهز وتدفى كويس عايزينها تدفى ويا سلام لو سيبتيها لما الخميرة تخمر

وبعدين تحطى الخلطه على شعرك كله واوتصى بالاجزاء المدمرة والفروة والاطراف وكله وبعدين بونيه بلاستيك ولو مفيش مش مشكله اى كيس بلاستيك وايشارب حلو كده واقعدى ساعتين

مرحله غسيل الشعر:

1- اشطفى الشعر بالماء فى الحوض لحد ما تحسى ان كل الخلطه اللى فى شعرك نزلت(البن بياخد شويه لحد ما ينزل من 3 الى 4 دقايق بالكتير والبلسم بيقوم بالباقى واما تسرحيه كل البن هيروح خالص)

2- اغسلى شعرك بالشامبو المخفف قليل جدا متكتريش الشامبو يعنى اقل كميه ممكنه من الشامبو وممكن تغسليه بحمام الكريم من غير ما يجى على الفروة .

3-ضعى على اطراف الشعر فقط القليل من البلسم او حمام الكريم واشطفيه بالماء جيدا(عدم شطف الشعر جيدا بيبوظه جدا)

4-لفى شعرك بفوطة وسبيه ينشف ربع ساعه

5-قسمى شعرك وادهنيه انا عن نفسى دهنته زيت النارجيل بتاع حراز بس ببعد عن الفروة

ده شكل العلبه

ودى من جوة الزجاجه

6-سرحى شعرك بمشط خشب براحه جدا اعتبريه ابنك اوعى تسرحيه وهو مبلول انتى كده بتقطعيه مش بتسرحيه

7- اعمليه كعكه لقدام وفكيه الصبح وادعيلى

ملاحظاتى على الوصفه من اول مرة : قولى ما شاء الله الاول كمان ما شاء الله

1-لمعان غريب بقاله كتير مشوفتوش فى شعرى

2- الهيشان قل بنسبه 70 فى الميه

3- طراوة بعد الشامبو على غير العاده برده

4-الكسرات اتفردت بنسبه 40 فى الميه او 50 فى الميه

5-التساقط قل شويه (لان التساقط عمر ما فيه حاجه هتخفيه من اول مرة )

6-لو حاله الشعر صعبه يعنى التقصف سارح لحد جدر الشعره هنحتاج نكرر الوصفه 2 مرة اسبوعيا لحد ما المشكله تتحل اوعى تكسلى النتيجه تستاهل

7- لو لسه الحاله فى اولها والتقصف فى اوله العلاج مش بيطول هو من اول اسبوع يعنى مرتين ومش هتعرفى شعرك

نصائح عامه :

1-اعملى تحليل هيموجلوبين ولو عندك انيميا اتعالجى لانها بتدمر الشعر

2-حبوب فيتازنك لمده شهر او شهرين

3-حبوب الخميرة رووعه للشعر والبشره او عايزة تتخنى بعد الاكل لو عايزة تخسى خديها قبل الاكل

4-لو عندك تساقط ادهنى فروة راسك كل يوم لوسيون لمنع التاسقط انا بستخدم تيتان (صحبتى جربته روووعه يارب يا مسهل)

5- قص 1 سم من الشعر كل 45 يوم ضرورى لمنع التقصف ومنع انه يزحف على بقيه الشعرة

6-غسل الشعر بمايه ساقعه او فاترة غير كده تبقى بتحرقى شعرك المايه السخنه دى دمار للشعر والبشرة (سمعتها من دكتور فى التليفزيون)

7-ياريت نجيب شامبو طبى لانه خالى من المواد المضرة للشعر

8- الوصفه دى ممكن تستخدميها قبل السشوار والمكواة هتخلى شعرك يسيح من حلاوته ياااي على الحلاوة

9- ابعدوا عن كل المنتجات اللى فيها سيليكون ده طله كارثه من كوارث الزمن لو بحثتوا بالانجلش هتلاقوا بلاوى اصلا مش بيدوب فى المايه معظم انواعه يعنى مهما غسلتى مش بيطلع من الشعر اصلا

10 - لو عندك تساقط ودورتك مش منتظمة وشعر جسمك زيادة لازم تعملى تحاليل وتتاكدى ان مش عندك تكيس للمبايض.

11- طبق السلطة كل يوم ده اساسى (جرجير-طماطم -فلفل-خيار بقدونس -شبت -جزر).

12- لو متزوجه او حامل او ناويه على حمل حمض الفوليك مفيد جدا للجسم كله عامه ومفيد كمان للشعر بس استشيرى صيدلى الاول.

واى سؤال انا تحت امركن كل اللى طالباه(فضلا وليس امر)
ادعولى بالذريه الصالحه المعافاه عاجلا غير اجلاوربنا يشفى امى واختى ويرزقنى الفردوس الاعلى