فتكات : الولادة الطبيعية بدون الم ( ملف كامل )

الولادة الطبيعية بدون الم فتكات

هو فيه ولادة بدون ألم ؟؟
- آه اكيد .
(( .. انت قصدك آخد الطلق كله وفي الآخر تديني حقنة البنج قبل خروج راس البيبي ))
- لا والله دي الولادة العادية اللي كل العالم بيولد بيها من قديم الأزل
.. الولادة بدون ألم حاجة تانية جديدة ومفيهاش إحساس ولا بالطلق ولا الولادة
طب ازاى ؟
نشرح بأة ؟

أكتر حاجة بتشغل بال أي حامل خصوصاً لأول مرة هو ألم الولادة..
وتبدأ تساؤلات ملهاش نهاية واقتراحات ملهاش أي أساس علمي من كل أفراد العائلة خصوصاً اللي سنهم عدوا الخمسين يعني بقوا بطبيعة الحال (دكاترة نساء) معروفة يعني :)
مامتك : اولدي طبيعي أنا ولدت 6 لوحدي في البيت.. بنات آخر زمن
أختك : اولدي قيصري عشان جرح الولادة الطبيعي (بيقولوا) عليه بيوجع قوي .
صاحبتك : ألم القيصري بعد الولادة ملوش حل وهتعيشي بيه بقية عمرك .
جارتك : اسمعي كلامي أنا كنت هموت من الطلق وانا بولد بنتي .. القيصري أحسن مليون مرة .
أنا : كل واحدة من اللي فاتوا دول تبص في ورقتها وملهاش دعوة بيكي وملكيش دعوة بيها .

أولاً .. كل واحدة حالتها غير التانية وعوامل كتير بتحدد انتي ممكن تولدي طبيعي ولا لأ وشرحتها قبل كدة
لكن البوست بتاع النهردة عشان أتكلم عن فكرة ( الألم ) في حد ذاته اللي بترعب أي واحدة داخلة على ولادة وبترعبني أنا كمان..
(الإبيديورال) عبارة عن تخدير للجزء السفلي للجسم عن طريق تركيب قسطرة رفيعة جداً في الظهر ( مش بتجيب شلل ولا بتوجع الظهر ولا بتعمل صداع ) .. تؤدي لفقدان الإحساس بالطلق من بدايته لنهايته
وبالتالي قدر يجمع مزايا الولادة الطبيعي ويبعد عن عيوبها ( ألم الطلق)
ودي خطواته :
1) الفحص في نصف الشهر التاسع تقريباً عشان نشوف انتي الحوض بتاعك مناسب للولادة الطبيعي ولا لأ من حيث أبعاد الحوض وأبعاد رأس البيبي ووزنه
وحالته الصحية وحالة عنق الرحم ولو لسة مش جاهزة بنشوف ممكن الانتظار ولا لأ وممكن الانتظار قد ايه..
2) لو توفرت الشروط دي بتاخدي ميعاد ولادة معين في المستشفى( مش بستنى لما يجيلك طلق) .
3) فيه شوية تعليمات وحاجات بتاخديها في البيت اليوم اللي قبل الولادة وهي عبارة عن تجهيز لعنق الرحم قبل الولادة.
4) بتيجي المستشفى في الميعاد وبتاخدي الإبيديورال قبل حدوث الطلق.
5) بيتم تركيب جهاز على البطن CTG لمتابعة نبض الجنين وقياس شدة الطلق ( لأنك مش حاسة بيه ) لضمان الأمان ليكي وللبيبي ..
نقطة مهمة جدا : البيبي مش بيحتاج شفاط ولا حاجة عشان يتولد ..