فتكات : تربية الفراخ البيضاء فى خطوات بسيطه

تربية الفراخ البيضاء فتكات

المشروع دا جميل جدا لو مش هتعمليه للربح يبقى اعمليه للأكل
الفراخ التربية البيتي أوفر وأنظف وأطعم وأضمن من اللي بتتباع
وساعة لما توصل للوزن المثالي هتقومي واخداها في شنطة وتربطي رجليها وتدبحيها عند المفرخة وتنضفيها بجنيه ونصف فقط

ـ ماتعمليش المشروع في مدخل العمارة أو المنور لكن فوق السطوح أو في شقة فاضية ع الطوب مثلا عشان الريحة والنظافة

ـ لازم متابعة جيدة وإلا مش هتوفري والفراخ مش هتكبر
ولازم فصيلة كويسة لأن الوحش كتير

ـ الفراخ البيضة مش بتاكل إلا عليقة بتتباع بالكيلو
وأنا عن نفسي كنت بحط ليهم عليقة بادي فقط وما بتسعملش نامي ولا ناهي خالص الفراخ كانت بسم الله ماشاء الله

ـ اشتري نشارة خشب من أقرب ورشة الشكارة بعشرة جنية وخليها عندك

ـ الفراخ البيضة لما بيزيد عمرها عن 50 يوم أو وزنها عن 3 كيلو بتبقى ماسخة جدا ومش هتوفر بل تمن العليقة هيكون أكتر من تمن لحمتها

ـ هاتي الكتاكيت عمر يوم أوفر لكي وبيكون سعرهم 3.5 ج للواحد سلالة كويسة وكيلو العلف أيضا 3.5 ج دا السعر عندنا في طنطا باقي المحافظات مش عارفة

ـ هاتي الأول 10 كتاكيت جربي فيهم لو عرفتي هاتي كتير وتوكلي على الله

ـ أي لحم أو فراخ تتحط في الديب فريزر لازم تبقى ماسخة أحسن حاجة اللحم الطازج

والآن مع الموضوع
ـــــــــــــــــ

مشروع جميل وكان في واحد شغال مساعد نقاش عندنا عامله وعنده 700 فرخ وإحنا كمان من هواة تربية الفراخ للدبيح وفراخ البيض من زمان جدا
وماشاء الله جميل بس محتاج تنضيف وفرش نشارة خشب ومتابعة دقيقة للأكل عشان بيحبوا ياكلوا بالليل والنهار عشان يكبروا بسرعة بيندبحوا على عمر 45 يوم وزنهم بيعدي 2.5 أو 3 كيلو
ودا أمثل وقت لدبحهم عشان مش يكلفوا علف كتير
وبيحتاجوا وهم صغيرين مكان ضيق ودافي وبعد ما يعدوا 15 يوم حطيهم في الشقة ومش تشتري أقفاص خالص مكلفة ومش ليها لازمة بالعكس بتضيع مساحات
أهم شيء نوع الفرخ لأن في أنواع مريضة وأنواع مش بتكبر مهما تاكل وأنواع لحمها مش حلو يعني أهم شيء فصيلة الفرخ كويسة
والرعاية الكويسة عشان ما يموتوش من البرد أو الأهمال والأكل بانتظام ليل ونهار عشان ما يخسوش ويوفروا وقت وعلف
ولمض من القديمة الحمر دي عشان بالليل وكمان قربيها منهم عشان تدفيهم وكتري عدد اللمض إحنا في برد
وافتحي الشبابيك وحطي سلك عليها عشان التهوية مهمة جدا
وبالنسبة للنظافة دي أهم شيء
افرشي مشمع وفوقيه كمية من نشارة الخشب بتتباع الشكارة بعشرة جنيه وبعد ما تتلوث بعد عدة أيام تشيلها وتحطي غيرها
بالنسبة لتطهير الجو هتجيبي قطعة خشب صغيرة أو فحم وتحطي عليها شطة كتير وتشعلي النار فيها هتطهر الجو
والمياه تغيريها على طول عشان الفراخ البيضة دي مش بتستحمل وبنضرب بيها المثل في الضعف
وطبعا ما تنسيش الدوا اللي بمعاد
من علامات الصحة إنهم يكبروا بسرعة وعرفهم يبقى أحمر مش وردي
ولحمهم يكون مسكر وبيكونوا أحلى كتير من اللي بيتباع بره
وممكن المشروع يفتح معاكم وتجيبوا مكن تفقيس أو تعملوا دبح وتنظيف وتوزيع مخصوص بيكم

وهقولك على حاجتين مش هتلاقيهم عند حد في مصر إلا أنا ولله الحمد
حطي في ميه الشرب شوية فلفل وشوية قرفة هيطهروا أمعائهم ويقللوا من موتهم ويزودوا سرعة نموهم ودي نتيجة علمية عملها باحث سعودي بإحصاءات وشغل علمي جامد
الحاجة التانية
هاتي راديو وشغلي دايما قرآن في الشقة بصوت هادي وهتشوفي البركة اللي فيهم وإنتي كمان اقرأي أمامهم الفاتحة والمعوذات وبركي وقولي ماشاء الله
وابقي قولي عملتي إيه وتابعي معانا هنا يافتوكات ياحلوين .