ارخص فنادق الاسكندرية فتكات
ازيكم يا فتوكاتى الحلوين انا قررت انا وجوزى اننا نغير جو فى العيد ونطلع اسكندريه وطبعا جوزى قالى كده وانا شغلت الفهامه
طبعا ما انا فتوكه اومال ايه وقالى هسافر اخر يوم رمضان وهنرجع رابع وم العيد وطبعا الميزانيه معايا وانا اللى هرتب

انا وجوزى اصلى لسه معنديش اولاد ولسه الاكل والبلاجات وكده ومتنسوش المواصلات لاننا معندناش عربيه
قعدت ادور عالنت من اوله لاخره ولقيت ثلاثه فنادق واتصلت بيهم قبل ما نروح علشان احجز وفعلا حجزت فيهم ال3 وقلتلهم لو معجبنش
يبقى خلاص قالوا اوك علشان قررنا نلف عليهم ال3 ونختار احسنهم لانهم جنب بعض ورينج السعر بينهم معقول المهم سافرنا
ونزلنا على اول واحد
الاول - مدخل الفندق عادى لا حلو ولا وحش الاستقبال عاليمين الاسانسير فى الوش والفندق 5 ادوار وموقعه حلو اوى تشوفى
البحر بالجنب من الغرفه المهم طلعنا الاوضه لقيناها مش حلوه اوى بصراحه بس اهى تقضى الغرض وكانت بالحمام وكانت عباره
عن سريرين وبينهم كمودينو وتربيزه جنب الباب عليها تليفون لتواصل مع الرسيبشن والبوفيه
عيوب الغرفه بقى مفيهاش مروحه ولا دولاب واللى خلنا مننزلش فيه ان الغرفه مفيهاش فيشه كهرباء يعنى لو حبينا نشحن الموبايل
يبقى تحت فى الرسيبشن وطبعا انا كان معايا كاتيل وانا جوزى مدمن شااااااى فطبعا من هنعرف نشغله علشان كده احنا مشينا منه
الاسعار بقى غرفه مزدوجه بحمام ب45 جنيه - غرفه مزدوجه بحمام فيها سخان ب50 جنيه -غرفه بها اربع سراير بدون حمام ب60 جنيه
الثانى - بعديه بشارعين بس هو ابعد شويه للبحر بس برضه تشوفى البحر من الجنب بس الاولانى كان اقرب بس احنا نزلنا فى ده
اولا الناس هناك محترمه جداااااااا فى التعامل وانا استريحت فيه نفسينا اكتر والاوضه اوسع وفرشها نضيف جدا لانى طبعا بشوف
المراتب اول ما ادخل والاوضه فيها سريرين وتربيزه وكرسين للاكل الغرفه بقى مفيهاش مروحه ولا دولاب وكمان بيوفر الاكل الوجبه فيها رز او مكرونه وشوربه وخضار وممكنلحمه او فراخ او كبده وبتتراوح من 12 لحد 20 وفى كمان وجبه ب6 جنيه عباره عن خضار
ورز وشوربه وسلطه بس من غير لحمه او فراخ
او كبده بس انا مجربتهاش بصراحه لانى كنت باكل بره وطبعا كان فيه فيشه كهربا علشان جوزى والشاى واول حاجه عملها لما دخلنا
الاوضه طلع الكاتيل وعمل شاى ههههههههههههه مش بقلكم مدمن شاى
الاسعار بقى غرفه مزدوجه بحمام ب70جنيه -غرفه مزدوجه بدون بحمام 50 جنيه وانا نزلت فى الاولانيه
الثالث - مرحتوش بس كنت متصله حاجزه زى ما قلتلكم واتصلت كنسلت الحجز وبس وكان قايلى غرفه مزدوجه بحمام ب73جنيه
الرابع - بعد الفندق الىى انا كنت نازله فيه بعمارتين وسالت فيه انا وجوزى واحنا بنجيب الفينو لسندوتشات البحروقالى غرفه مزدوجه
بدون حمام بس فيها مروحه ب 50 جنيه ومدخل الفندق كويس وشكله حلو بس مشفتش الاوضه علشان كله كومبليت
وقضينا فى اجمل اربع ايام رحت شاطى البوريفاج وستانلى وكلت كشرى عند بندق وكبده عند فهمى جاااااااااااااامده
موووووووووووت وكلنا يوم بيتزا وكان الفطار سندوتشات عالبحر والحمدلله قضينا كام يوم حلوين جدااااااا وبرضه مخرمتش الميزانيه
فقلت افيد الفتوكات يمكن حد يحب يروح يومين وامكانياته متوسطه زى فيقدر يتمتع فى حدود الامكانيات واى استفسار انا تحت
امركم ومعايا تفاصيل كل الفنادق ماعدا الرابع لانى الت عليه فى طريقى وربنا يسعد ايامكم يارب وياريت تدعولى بالذريه الصالحه