فتكات : تجربتي مع الحقن المجهري وحساب الحمل بعد الحقن المجهري

حساب الحمل بعد الحقن المجهري فتكات
انا هقسم الموضوع لاجزاء وهى:
اولا:امتى فكرت ف موضوع الحقن المجهرى
ثانيا:ايه المشكلات اللى خلتنى اتجه للحقن المجهرى
ثالثا:ايه الحجات اللى تخلينى اعمل العمليه ف مركز معين مش غيره
رابعا:نصائح هاااامه جدا قبل العمليه
خامسا:نصائح عامه بعد نقل الاجنه (هااااام جدا من خلال تجربتى)
سادسا:تفاصيل تجربتى الشخصيه فى العمليه.

ملحوظه: العمليه كلفتنى 12 الف جنيه،وده لانى احتجت علاجات كتير،يعنى ممكن مع غيرى تتكلف اقل من كده لو الحاله مش محتاجه لجرعه علاج كبير وممكن تكلف اكتر من 12 الف لو الزوج هيعمل سحب عينه من الخضيه.

اولا:امتى فكرت ف موضوع الحقن المجهرى
فكرت فيه بعد حوالى تسع شهور من الجواز لما اتاخر حمل وعملت شويه تحاليل
وعرفت انه عندى مشكلات،قلت يبقى لا قدر الله لو اتاخر الحمل اكتر ممكن اعمله
المهم بعدها كنت كملت سنه تقريبا جواز لقيت ان جوزى برضو تحاليه مش حلوه خااااالص والحمد لله
المهم جوزى فضل كتيييييييييييير ياخد علاجات بدون فائده
مكملات غذائيه وفيتامينات ,,,,,وبرضو مفيش فائده
المهم قررت اعمل العمليه ورحت لمركز (الله يسامحهم)الدكتور قالى هعمل لك تلقيح صناعى
رغم ان جوزى التحاليل بتاعته كان العدد 4مليون
يعنى التلقيح ماينفعش...برضو عملوه لى ومنجحش
المهم بعدها بسنه رحت تانى وقلت المره دى بقى حقن مجهرى
وعملوا لى العمليه من غير اى استعدادات غير بس تحاليل بسيطه
(وظائف كبد وكلى+فيروسات)ومعملوش اى تحايل تانيه سواء هرمونات لى ،تحليل غده درقيه،نسبه تجلط،فيروسات التكسوبلازما
وده اكبر غلط ممكن يعمله اى مركز
المهم الحمد لله فشلت وكنت هعملها هناك تانى لولا واحده هنا فى المنتدى قالت لى مينفعش اعملها تانى وانا عندى تكيسات
وده طبعا المركز لم يراعيه فى العمليه.

ثانيا:ايه المشكلات اللى خلتنى اتجه للحقن المجهرى:
مشكله العدد انه قليل اوى عند جوزى ومش بيتحسن بالعلاج
وعمل عمليه دوالى والعدد نفس الشىء لم يتحسن
كان بالكتير 4مليون
واكتشفت قبل العمليه بقى ان الرجاله اللى عندهم هرمون ال Fsh عالى مهما اخدوا من علاج مش بيتحسن العدد معاهم
وسبحان الله الدكتور طلب من جوزى التحليل ده لقى الهرمون مرتفع جدا عنده وقال له (الهرمون ده لما بيعلى ده بيسبقى حلجه كده من عند ربنا
ملهوش علاج و الحل انك تسرع اد ما تقدر فى عمليه الحقن المجهرى)
ولذلك نصيحه لكل اخت هنا فى المنتدى جوزها العدد عنده قليل، لاااازم تعملوا التحليل ده لانه على اساسه بيقرر الدكتور هتعملوا ايه وايه خطه العلاج اللى هتناسبه.
ومشكلتى انا كان عندى تكيسات ولخبطه هرمونات وقصور فى الغده الدرقيه.
وطبعا ظبطت الغده الاول المره دى قبل ما اعمل العمليه
لقيت البريود انتظمت والامور تحسنت كتير اوى

ثالثا:ايه الحجات اللى تخلينى اعمل العمليه ف مركز معين مش غيره
*انك تلاقى الدكتور ف المقابله الاولى بيسمعك كويس ومش بيكروت وبيسمع منك اى شكوى او استفسار
*يعمل له تحاليل هرمونات شامله،مش يقول لك تعالى اليوم العشرين نبتدى الحقن التحضيريه وخلاص
لان المركز الصح الى بيفهم المفروض يكونوا عارفين ان كل حاله واحده له خطه علاج غير واحده تانيه
*المركز الكويس لو لقاكى محتاجه علاج وتظبيط هرمونات هيتابعوا معاكى العلاج لحد ما تبقى كويسه وبعدين يبدأو العلاج
ولو فى حاجه تانى هبقى اقولها لكم لو افتكرتها...

رابعا:نصائح هاااامه جدا قبل العمليه
ودى هتخص اكتر البنات اللى عنده تكيسات والبيريود ملخبطه معاهم
*اكشفى وظبتى نفسك كويس اوى قبل العمليه
ولازم تظبطى هرموناتك وخصوصا لو عندك قصور فى الغده الدرقيه لانه ممكن يكون سبب لخبطه البريود
*خفضى وزنك على اد ما تقدرى هيكون افضل والتبويض ونوعيه البويضات هتكون احست
*خدى سيدوفاج وطبعا تحت اشراف الدكتور بتاعك
ظبطى هرمون التبويض بتاعك مع الدكتور(والله انا عن نفسى عملت ده كله وبضل الله كنت كويسه جداااا قبل العمليه)

خامسا:نصائح عامه بعد نقل الاجنه (هااااام جدا من خلال تجربتى)
*النوم على الضهر عقب نقل الاجنه مباشره لمده ساعين وعدم الحركه نهائى.
*قبل النقل المثانه بتون غير مفرغه(لازم تبقى مزنوقه معلش استحملى).
*طبعا المثبتات بتتاخد من يوم شفط البويضات.
*بعد ساعتين ممكن تقومى بالراحه خالص تروحى التويلت
*ارجعى ريحى تانى وممكن النوم ع الجانبين عادى وبأمان مفهاش مشكله
*وانتى مروحه من المركز اركبى وسيله مواصلات مريحه،تجنبى المطبات واركبى كنب السواق ورجعى الكرسى لورا كأنك فارده ضهرك يعنى.
*الوضوه مترفعيش رجلك على الحوض لغسلها.
*سورى بلاش التويلت اللى القاعده بلدى ممنوووووعه.
*بلاش تملى الببنيو مايه وتقعدى فيها.
*استحمى عادى.ويفضل بعد تلات ايام من اانقل.
*صلى وانتى قاعده.
*اول تلات ايام نوم فى السرير،وكل ساعتين قومى اتمشى لمده 10 دقايق
بعد كده ال11 يوم اللى بعدهم حركه خفيفه فى الشقه طبعا بدون بذل مجهود وبدون شيل حجات تقيله اكيد.
*التزمى بمواعيد المثبتات زى الدكتور ما قال لك بالظبط.
*اهتمى بشرب المياه بكثره(ع الاقل 3لتر يوميا)،واهتمى باكل البروتين بكثره سواء كان فراخ مشويه او بياض البيض او اللبن والجبن الطبيعيه.
(ثبت ان البروتينات بتساعد الاجنه على الالتصاق الجيد دخل الرحم وبتساعد على جوده الانقسامات،،والله وانا جربتها بنفسى)

سادسا:تفاصيل تجربتى الشخصيه فى العمليه
رحت طبعا المركز وكانت اول مقابله لى مع دكتور محمد حسين،دكتور النساء
وويته اخر تحاليل عملتها خاصه بالهرمونات بتاعتى وخاهص بتحاليل وهرمونات زوجى
راح قالى (احنا مش هنعمل لك اى خطوه من خطوات الحقن المجهرى قبل انتى ما تعملى تلات حجات مهمين
1:خسى من وزنك تلاته كيلو على الاقل
2:اضبط هرمون الغده الدرقيه اللى كان فيه قصور شديد
3:اضبط هرمون الLhوادانى هو حبوب منع الحمل لمده شهرين
وقالى تعملى التلات حجات دول وتحللى هرمونات تتصلى بينا نقولك تيجى لنا امتى
الحمد لله فى الفتره دى خسيت شويه حلوين،،،ولما جت البيريود حللت هرمونات شامله
لقيت الغده مظبطه ولقيت هرمون ال Lh لسسسسه شويه صغننه على ما يتظبط
المهم اتصلت قالوا لى خدى حبوب منع الحمل شهر كمان وحللى لاننا عاوزين الهرمونات تبقى مظبوووووطه جدا
عملت كده وحللت لقيت كله تمام،واتصلت وحجزت لجنه طبيه علشان اعرف خطه العلاج اللى همشى عليها
ورحت وكانت المقابله مع د مها وقالت لى
ان خطه العلاج بالنسبه لى هتكون اننا هنبدأ معاكى تنشيط من تانى يوم البيريود،لانك كنتى مريضه تكيسات سابقا ومتوقع جدا انه يكون الاستجابه بطيئه،المهم عملت السونار المهبلى تانى يوم بيريود وبدات التنشيط فى اليوم ده
كنت باخد فوستيمون 3بودر فى 2 مايه
وبقيت اتابع التبويض ،،والدكتور قالى رغم انك طلعتى بويضات كتير الا انك حجمها صغير واستجابتك بطيئه للمنشط
وبقيت اتابع يومين ويوم،والاستجابه بطيئه برضو
لحد معاد اللجنه الطبيه التانيه راحت دكتوره مها قالت لى ان انتى سبب بطء التبويض ان الغده الدرقيه عنده كانت معطله شغل المبايض عندك بشكل كبيييييير جدا،ويااادوب المبايض اللى بدأت تشتغل،وقالت لى ان الكونسلتو بتاع اللجنه الطبيه كان هيأجل العمليه للسايكل الجايه
لكن انا شايفه انك مازال عندك نسبه اكتر من 50فى الميه ان البويضات تكبر،وبالفعل زودت جرعه المنشط واخدت منيجون مع الفوستيمون
والحمد لله بعدها التبويض كبر ،،،،،واخيرا تحدد معاد العمليه
وفى اليوم ده رحت صايمه واستعديت ودعيت ربنا كتيييييييييييييييييييييييييييييير
ودخلت اوضه العمليات واتخدرت بنج كلى وفى ثوانى لقيت نفسى نمت وصحيت،كأنه حلم،،،،وبعدين طبعا بيكون في شويه مغص ناحيه المبايض
بيبتدى يروح تدريجى شويه بشويه لحد ما بيروح خااااااااااااااااااااالص،بعد شويه جت الدكتوره تقولى (احنا سحبنا ماشاء الله منك 21 بويضه،وقالت لى كمان هتبتدى المثبتات من النهارده وكانت عباره عن لبوس برنتوجيست 400ملجم 2وحدات يوميا+برشام سيكلو بريجونوفا اخد الحبوب الابيض بس لحد يوم تحليل اختبار الحمل)،وطبعا ريحت هناك ساعه كامله قبل ما يكتبوا لى على خروج وبعدها روحت والغلبان قاعد مستنى كل ده بره
الحمد لله...
يوم نقل الاجنه كان يوم عمورى ما هنساه
رحت فاطره عادى لانه بيتعمل من غير اى بنج خاااااالص
طبعا ما روحتش الحمام قبل ما اروح المستشفى بساعتين
وعمااااااله اشرب عصاير ومايه،ولما وصلت وجه معاد دخولى غرفه العمليات وقبل ما ادخل قالت لى الدكتوره(احنا هننقل لك تلات اجنه درجه اولى
وعندك 9 اجنه تانى صالحين للتجميد اما باقى البويضات ما كانتش كويسه اصلا)حمدت ربنا وشكرت فضله وقلت ياااااااااااااااااااارب.
دخلت اوضه النقل ونمت ع السرير زى كده كشف النساء الدكتور حط لى حاجه بيوسع بيها عنق الرحم ويدخل قسطره رفيعه فيها الاجنه
وبعدين قالى خدى شهقه طويله وحط لى البتاعه دى
ونقل لى الاجنه وسحب البتاعه علطول بره
ودونى بعد كده على غرفتى وانا كنت مختاره انى ابات ليله فى المستشفى بدل ما اطلع فى نفس اليوم لانه الكل بيخرج بعد ساعتين بس والمبيت ده بيبقى احتيارى...
وريحت ساعتين كاملين على ضهرى بعدها قمت رحت التوالت عادى
ورجعت ريحت تانى،وبعدين تانى يوم خرجت
ومشيت ع التعليمات اللى قالوها لى،وقالوا لى فى حاله حدوث حمل بلاش علاق زوجيه نهااااائى ف اول تلات شهوووور من الحمل
وف الفتره دى وبعد النقل باسبوع تعبببببببببببببببببببببببت جدا حسيت انى مش قادره اتنفس وحسيت بشده فى بطنى جامده اوى
صبرت اسوع ع الوضع ده لحد اليوم ال 13 للنقل وبعدين الموضوع تطور جدا وكنت مكتووووومه النفس خالص
لحد ما رحت لهم المستشفى من كتر التعب وحجزونى وكشفوا عليا وعرفت انى عندى فرط تنشيط تبويض
وعملت سونار وقالوا لى ان حالتى بسيطه وان فى ناس بتبقى اكتر بكتير وقالوا لى هتستنى عندنا تحت الملاحظه
وخلونى اشرب مايه كتييييييييييييييييييييييييير جدا جدا جدااااااااااااا
وبعدين تانى يوم عملت تحاليل وسونار واختبار الحمل وكنت فى اليوم ال 14
اه نسيت اقولكم الدكتوره قالت لى اثناء عمل السونار انه ده بيحصل لما بتكونى حامل!!!
استغربت ولما استفهمت منها قالت لى يعنى بعد نقل الاجنه اللى بيحصل عنده رشح مائى (وانا كان حاصل لى عند المباض)بتكون فرص الحمل عندهم عاليه(وده سمعت عنه من الدكتور اللى بييجى على قناه الحياه)
وحللت والف حمد والف شكر لله طلعت حاااااااااااااامل
بعدها ب 14يوم رحت هناك اعمل اول سونار وشفت كيس البيبى وعرقت ان واحد بس من التلاته هو اللى ثبت وشفت الكيس والنبض كان تمام ولله الحمد

ودى كانت كللللللل حاجه
وطبعا العمليه عملتها فى مستفى ادم الدولى اللى ف المهندسين
ولو افتكرت اى معلومات تانى اكيد هاجى جرى اقولها
ولو حد عنده استفسار انا موجوده يومى
واخيرا دعواتكم معايا انى اقوم بالسلامه وحملى يتم على خير ياااارب
بحبكم فى الله وربنا يكرمكم كلكم ياااارب وما يحرم حد من الامومه انه على كل شىء قدير.