ميزانية البيت فتكات ( مش هقولك..ميزانيتي بكام؟؟!♥♥بس هعلمك..توفري ازاي؟؟! )
ازيكو يافتوكات منورين والله
عاوزه اشكر كل اخت هنا بتكتبلنا اي معلومه تفيدنا بيها
بجد أنا اتعلمت منكم كتير اووي
ربنا يجازيكم كل خير
انهارده حابه افيد زي مابستفيد
هبتدي الحكايه من اول لحظه مسكت فيها المصروف
بصراحه كنت محتاسه اااخر حوسه
امسك 500ج ... مايكفوش
امسك 900ج ... برضو مابيكفوش
ساعتها عرفت ان المشكله فياباضحك
يعدي شهر ورا شهر ونفس المشكله ومش عارفه حتي اكفي البيت
وماببقاش عارفه المصروف راح فين!!
لحد 7 شهور جواز وانا ببحث عن طريقه اني اكفي بيها طلبات البيت ﻻخر الشهر وساعتها عرفت ايه الاخطاء اللي بنقع فيها
أوﻻ انا كنت اول ماامسك المصروف اقوم نازله اشتري 4 فرخات و2ك لحمه و1/2ك كبده الخ الخ
واخزن واملا التلاجه والفريزر لحوم وفراخ وخضار
والاقيني من يوم 1 في الشهر بقا معايا 100ج المفروض اي حاجات ناقصه اجيبها منها
طب ازززاااي دي تكفي خضار كل اسبوع ولو جوزي عاوز اكله سمك ف يوم بيبقا صعب اوفرهاله
الخطأ هنا اني بخزن حاجات ممكن جوزي مايجيلوش نفس ليه وبالتالي اللحوم والفراخ تفضل عندي في الفريزر للشهر اللي بعده واللي دفع التمن هو جوزيباضحك
الحل بقا اللي نظملي الموضوع اني بقيت اجيب طلبات الاسبوع بإسبوع
مثلا انا بنزل السوق كل جمعه فلو معنديش فراخ فاقوم اشتري فرخه ولو جوزي موصيني ع اي حاجه نفسه فيها فبشتريها واشتري الخضار المطلوب واجيب نوعين فاكهه واحد للعصير وواحد للأكل...مثلا 1ك ونص جوافه و1ك ونص كمتري هكذا ..اي نوع انتي وجوزك بتحبوه
حاجه كمان لو انتو اتنين بس فماتجيبيش خضار فوق احتياجتكو الاسبوعيه عشان مفيش حاجه تبوظ عندك وتترمي
يعني انا مثلا لما بنزل السوق بشتري
1ك طماطم جامده للسلطه ب1.5ج
1ك ونص طماطم للصلصه ب1ج
1/2ك فلفل رومي ب1ج
1/2ك خيار ب1ج
1/4ك جزر ب1ج
1/2ك كوسه ب2ج
( ملحوظه: انا بكون مخزنه ملوخيه وباميه وبسله وفاصوليا وقلقاس والبصل والتوم )
احسبو بقا معايا بشتري الخضار بكام في الاسبوع يعني ب7.5ج نقول 10ج خضار في الاسبوع
ونوعين فاكهه ام 3ك ب10ج هتاخدي كيلو ونص من نوعين فاكهه
والفرخه ب25ج +1/4كبده ب5ج يعني مشيتي طلبات الاسبوع ب50ج
فيه فكره تانيه هتوفر عليكي
انتي مثلا لو بتصرفي 400ج ف الشهر
فإقسميهم خلي نصهم للحاجات اللي بتجبيها مره في الشهر وكمان لمتطلبات الفطار والعشاء
يعني مثلا خزين البيت
شكارة رز 10ك بجيبها من هايبر وان ب35ج بتقعد شهرين
بعمل حركه لذيذه لما بكون بشتري حاجه في شهر وشهر لا فبجيب بدالها حاجه تانيه
يعني مثلا بجيب باكيته المسحوق الاتوماتيك 4ك من الهايبر نوع اسمه توب فاليو فبتقعد معايا شهرين
فانا اقوم اعمل ايييييه
اجيب شهر رز وشهر مسحوق .... فاهمين
نكمل نقطه تقسيم المصروف عشان ماتتهوش مني
انتي هتخصصي نص المصروف للطلبات الشهريه والخزين
والنص التاني يتقسم علي ال4 اسابيع للطلبات الاسبوعيه يعني كل اسبوع 50ج
هنمسك ال200ج بتاعة الخزين
هتجيبي شكاره رز ب35ج
عرض مكرونه ال7 ب10ج
وعرض زيت عباد بجيبه ب28ج
وعلبه جبنه دومتي الكيلو وشويه دي بحوالي 22ج
كرتونة بيض ب20
كده 115ج
بجيب عرض لبن كل يوم من الهايبر برضو ال4ب10ج
وبجيب نص بانيه ب20ج
و1ك وراك ب17ج
ونص كبدة فراخ ب11ج
ندخل عالمنظفات بقا
بجيب الباكيت المسحوق الاتوماتيك 4ك ب25 ج
وازازه كلور ابيض ب4.5ج
وكلور الوان ب7.5ج
وزي مااتفقنا اني بجيب شهر الرز وشهر المسحوق والكلور يعني بيكفوني شهرين
كده حسبتنا 173ج من غير المنظفات
ضيفي عليهم 12ج منظفات متنوعه سايبه
لتر كلور للارضيات ب1.5ج
2لتر صابون سايل مركز ب2.5ج
لتر داوني ب2.5ج
لتر ديتول سايب ب3ج
صابونة وش ب2.5ج
يعني كده 185ج
باقي 15ج من ال200ج بتاعة الخزين دي حسب ماتوجهيها
انا مثلا بجيب منهم العطاره
ربع حمص وعدس للكشري ب5ج
ونص لسان عصفورب2ج
وكيس ملح ب1ج
وتركيبه فلفل اسود ب5ج
وب2ج شطه
وباقي البهارات بتكون متوفره في البيت وكل شهر بجيب من اي نوع ب2ج بيقعدو معايا شهرين وزياده حسب الاستخدام
ملحوظه انا بجيب الدقيق من ضمن مشتروات الاسبوع لاني مش بستهلكه كتير
والسكر من التموين
والعيش جوزي اللي بيجيبه
************** الهدف من الموضوع انك تعرفي ازاي تجيبي طلباتك كلها وتوفري لنفسك كمان ويعني لو مصروفك ماشاء الله كبير فإنتي تتعلمي ازاي توفري منه ولو مصروفك علي ادكم ربنا يوسع رزق ازواجنا يارب فإنتي تعرفي تمشي المصروف عشان محدش ينظر ان الل بيمشي البيت بالطريقه دي يبقا ظروفه تعبانه ﻻ يافتوكات اوعوا تفكروا كده*******************
ملحوظة : دى اسعار سنة 2014 يعنى هتلاقي اختلاف في الاسعار دلوقتي .
تحميل محتوى الموضوع
عرض نسخة صالحة للطباعة
أرسل هذا الموضوع إلى صديق